DİVAN EDEBİYATINDAN SEÇMELER: II
Hazırlayan: Hülya CANPOLAT
GAZEL
Yine zevrâk-ı derûnum kırılıp kenâre düştü
Dayanır mı şîşedir bu reh-i sengsâre düştü
O zaman ki bezm-i canda bölüşüldü kâle-i kâm
Bize hisse-i muhabbet dil-i pâre pâre düştü
Gehi zîr-i serde desti geh ayağı koltuğunda
Düşe kalka haste-i gam der-i lûtf-i yâre düştü
Erişüp bâhâra bülbül yenilendi sohbet-i gül
Yine nevbet-i tahammül dil-i bîkarâre düştü
Meh-i burc-ı ârızında gönül oldu hâle mâil
Bana kendi tâliimden bu siyeh sitâre düştü
Süzülüp o çeşm-i âhû dedi zevk-i vasla yâhû
Bu değildi neyleyim bu yolum intizâre düştü
Reh-i mevlevide Galib bu sıfatla kaldı hayran
Kimi terk-i nâm ü şâna kimi i’tibâre düştü
GALİP
GAZEL
Cihân-ârâ cihân içindedir arayı bilmezler
Ol mâhîler ki deryâ içredir deryâyı bilmezler
Harâbât ehline dûzah azâbın anma ey zâhid
Ki bunlar ibn-i vakt oldu gam-ı ferdâyı bilmezler
Şafak-gûn kan içinde dâğını seyreyler âşıklar
Güneşde zerre görmezler felekde ayı bilmezler
Hamîde kadlerine rişte-i eşki takup bunlar
Atarlar tîr-i maksûdu nedendir yayı bilmezler
Hayâlî fakr şâlına çekenler cism-i uryânı
Anınla fahrederler atlas ü dibâyı bilmezler
HAYÂLÎ
GAZEL
Tûti-i mu’cize gûyem ne desem lâf değil
Çerh ile söyleşemem âyinesi sâf değil
Ehl-i dildir diyemem sînesi sâf olmayana
Ehl-i dil birbirini bilmemek insâf değil
Yine endîşe bilür kadr-i dûr-i gûftârım
Rüzgâr ise denî dehr ise sarrâf değil
Girdi miftâh-i der-i genc-i maânî elime
Âleme bezl-i güher eylesem itlâf değil
Levh-i mahfûz-i sühandir dil-i pâk-i Nef’î
Tab’-i yâran gibi dükkâçe-i sahhâf değil
NEF’î
GAZEL
Mest-i nâzım kim büyüttü böyle bî-pervâ seni
Kim yetiştirdi bu gûnâ servden bâla seni
Bûydan hoş rengten pâkîzedir nâzik tenin
Beslemiş koynunda gûya kim gül-i ra’nâ seni
Güllü dîbâ giydin ammâ korkarım âzâr eder
Nâzenînim sâye-i hâr-ı gül-i dîbâ seni
Bir elinde gül bir elde câm geldin sâkiyâ
Kangısın alsam gülü yahut ki câmı ya seni
Sandı olmuş ceste bir fevvâre-i âb-ı hayât
Böyle gösterdi bana ol kadd-i müstesnâ seni
Ben dedikçe böyle kim kıldı Nedîmi nâtüvân
Gösterir engüşt ile meclisteki mînâ seni
NEDİM